«ՎԱՀԱՆԱՁԵՎ ԳԵՂՁԻ ԿՈՎԿԱՍՅԱՆ ԴՊՐՈՑԸ» կանցկացվի նաև հաջորդ տարի. Արամ Բադալյան

Օրեր առաջ ավարտվեց տարածաշրջանում առաջին անգամ կազմակերպված «ՎԱՀԱՆԱՁԵՎ ԳԵՂՁԻ ԿՈՎԿԱՍՅԱՆ ԴՊՐՈՑ» միջազգային ուսումնական դասընթացը: Հայաստանի հակաքաղցկեղային լիգայի փոխնախագահ Արամ Բադալյանի խոսքով նման դպրոցները պարբերաբար անցկացվում են Ռուսաստանում, Սանկտ-Պետերբուրգում, բայց Հարավային Կովկասի տարածաշրջանում այն առաջին անգամ է անցկացվում:

Ուսումնական դասընթացի հիմնական թեմաներն էին՝ վահանաձև գեղձի քաղցկեղով հիվանդների ախտորոշումը, բուժումը և վարումը: Միջոցառմանը մասնակցում էին մոտ 200 մասնագետներ ԱՊՀ երկրներից:

Հրավիրված հյուրերի կազմում էին ոչ միայն հայաստանյան առաջատար մասնագետներն, այլև Էնդոկրին Վիրաբուժության Հյուսիսարևմտյան Կենտրոնի (Սանկտ-Պետերբուրգ) ղեկավար պրոֆեսոր Իլյա Սլեպցովը, Բլոխինի անվան Ուռուցքաբանության Գիտական Կենտրոնի գլխի և պարանոցի ուռուցքների բաժնի ղեկավար պրոֆեսոր Ալի Մուդունովը, Ռուսաստանի էնդոկրինոլոգիայի գիտական կենտրոնի էնդոկրին վիրաբույժ, պրոֆեսոր Վլադիմիր Վանուշկոն, Վրաստանի էնդոկրին վիրաբույժների ասուցիացիայի նախագահ Էդիշեռ Սուխառուլիձեն, Դանիլևսկու Էնդոկրինոլոգիայի ինստիտուտից (Խարկով) Վադիմ Խազիևը և այլք:

Արամ Բադալյանի խոսքով նման դպրոցը հնարավորություն է տալիս ինչպես Հայաստանի այնպես էլ տարածաշրջանի բոլոր օղակի մասնագետներին շփվել վիճելի հարցերի շուրջ, կարծքիներ փոխանակել և ստանալ նոր գիտելիքներ առաջատար մասնագետների կողմից: Դպրոցի բոլոր մասնակիցները փաստել են խնդրի արդիականությունը. վահանձև գեղձի քաղցկեղի հիվանդացությունը աճում է ոչ միայն Կովկասյան տարածաշրջանում, այլև ամբողջ աշխարհում: Ճիշտ է, փորձագետները նշում են, որ այս հարցում կարևոր դեր է խաղում ախտորոշիչ սարքերի տեխնոլոգիական զարգացումը և ախտորոշման որակի բարձրացումը:

Դրանից բացի փոխվում են բուժման մոտեցումները և այն, ինչ 70-80-ական թվականներին համարվում էր անփոփոխ, այսօր արդեն ենթակա է վերանայման: Ուստի անհրաժեշտ է փոխանակել կուտակված փորձը եւ համակարգել վահանաձև գեղձի քաղցկեղի բուժման մոտեցումները,  որոնք պատմականորեն տարբեր երկրներում տարբեր կերպ են ձևավորվել:

Հայաստանի հակաքաղցկեղային լիգայի փոխնախագահ Արամ Բադալյանից հետաքրքրվեցինք, թե արդյոք շարունակական բնույթ է կրելու դպրոցը և նա պատասխանեց. «Այո, իհարկե, նախատեսում ենք կազմակերպել ամեն տարի: Մյուս տարի մտադիր ենք հրավիրել Եվրոպայի և Հյուսիսային Ամերիկայի այս ոլորտի առաջատար մասնագտներին: Եվրոպական և ամերիկյան դպրոցների մոտեցումները տարբեր են, փորձելու ենք ընդհանուր հայտարարի գալ և հասկանալ`վերջապես ո՞ր ուղեցույցներով ենք շարժվում` ամերիկյան, թե եվրոպական: Սպասում ենք մասնագետների Իտալիայից, Գերմանիայից, ԱՄՆ-ից»:

Այն հարցին, թե ի՞նչ փոփոխություներ են լինելու և ի՞նչ նոր նախագծեր կան կապված «ՎԱՀԱՆԱՁԵՎ ԳԵՂՁԻ ԿՈՎԿԱՍՅԱՆ ԴՊՐՈՑ» միջազգային ուսումնական դասընթացի հետ, Արամ Բադալյանը նշեց, որ ընթացիկ տարում նախատեսում են հիմնել «Հայկական թիրեոիդային ասոցիացիա». «Ասոցիացիայի շրջանակներում փորձելու ենք համախմբել այս խնդրով զբաղվող բոլոր մասնագետներին, հրապարակել ուղեցույց`հիմնված «ՎԱՀԱՆԱՁԵՎ ԳԵՂՁԻ ԿՈՎԿԱՍՅԱՆ ԴՊՐՈՑԻ» նյութի վրա և այն հնարավորինս տարածել ՀՀ բոլոր մարզերում՝ սկսած առաջին օղակի մասնագետներից: Դրանով իսկ դպրոցի նպատակը կդառնա արդարացված: Մենք պետք է ուսանենք բոլորին և ինքներս ուսանենք ամեն տարի: Նախագծերը շատ են, բայց բոլոր փակագծերը հնարավոր չէ բացել»:


Աղբյուր`Doctors.am