Ընտանի կենդանիներ պահելը կարող է երեխաների մոտ ասթմայի առաջացման պատճառ դառնալ: Սա փոքր-ինչ հնացած տեղեկատվություն է: Նոր ուսումնասիրությունները խոսում են այլ փաստարկումների մասին:
Ասթման շնչառական ուղիների բորբոքային հիվանդություն է, որի առաջացման գործոններ համարվում են ինչպես ժառանգական նախատրամադրվածությունը, այնպես էլ ալերգենները, օդի աղտոտվածությունը, շրջակա միջավայրի քիմիական նյութերը, ծխախոտի ծուխը:
Բժիշկներն ասթմայի առաջացումը կանխելու համար խորհուրդ էին տալիս նվազեցնել ռիսկի գործոնները, այդ թվում՝ բացառել տանը ընտանի կենդանիներ՝ շուն, կատու պահելը:
Վերջերս կատարված մի ուսումնասիրության համաձայն, սակայն, կատվի ալերգենները միշտ չէ, որ ասթմայի պատճառ են: Ճիշտ հակառակը:
Դանիացի բժիշկներն ուսումնասիրել են շների և կատուների ազդեցությունը՝ երեխաների մոտ ասթմայի առաջացման հարցում: Պարզվում է՝ տանը կատու ունենալն էապես նվազեցնում է ժառանգական նախատրամադրվածությամբ՝ ասթմայով կամ թոքերի բորբոքումով հիվանդանալու հավանականությունը:
Ուսումնասիրություններն անցկացվել են 377 երեխաների շրջանում, որոնց մայրերն ունեցել են ասթմա: Նրանցից 109-ի մոտ հայտնաբերվել է ասթմայի ժառանգական նախատրամադրվածություն: Երեխաներից 281-ի տանը վաղ հասակում որևէ կենդանի չի եղել, 12-ինը եղել է և՛ շուն, և՛ կատու, իսկ մյուսները տանն ունեցել են այդ երկու կենդանիներից միայն մեկը:
Բժիշկներն ուսումնասիրել են այդ երեխաների անկողիններում առկա կենդանական ալերգենների քանակը: Այնուհետ գնահատել են յուրաքանչյուր երեխայի մոտ ասթմայի առաջացման հավանականությունը: Նրանց, ում տանն ալերգենների մեծ քանակություն է արձանագրվել, ասթմայի ռիսկը բժիշկները գնահատել են 20 տոկոս, փոքր քանակի դեպքում՝ կրկնակի:Երեխայի ծննդից կարճ ժամանակ առաջ և հետո միջավայրի գործոններն էապես ազդում են նրա իմունային համակարգի վրա: Ենթադրվում է, որ տանը կենդանիների ներկայությունը մեծացնում է այդ միջավայրում մանրէների քանակն ու բազմազանությունը, ինչն էլ կատարելագործում է փոքրիկի իմունային համակարգը:
Աղբյուրը՝ https://www.wissenschaft-aktuell.de/
