«Տոշիբա Մեդիքալ Սիսթեմս» ընկերության ղեկավար կազմի գործնական այցը Երևան

 

Հյուրերի առաջին հանդիպումը ԵՊԲՀ ղեկավար կազմի հետ էր՝ ռեկտոր Միքայել Նարիմանյանի, կլինիկական աշխատանքների գծով պրոռեկտոր Արմեն Մինասյանի գլխավորությամբ:

Մ. Նարիմանյանը հանդիպման ընթացքում հույս հայտնեց, որ «Տոշիբա Մեդիքալ Սիսթեմս»  ընկերության հետ համագործակցությունը կլինի երկարատև և շարունակական:

 

- Տոշիբա Մեդիքալ Սիսթեմս ընկերությունը ձեռնամուխ է ոչ միայն որակյալ տեխնիկայի արտադրման, մատակարարման գործում, այլ նաև բժիշկ-ճառագայթաբաններին տեխնիկային ամբողջությամբ ծանոթացնելու, վերապատրաստելու և ուսուցման կազմակերպման գործում, այն մշտապես եղել է կրթական ծրագրերի ակտիվ նախաձեռնող, - ասում է 2015 թվականից Հայաստանում «Տոշիբա Մեդիքալ Սիսթեմս» ընկերության պաշտոնական ներկայացուցիչ «Դիավանտ» ընկերության հիմնադիր-տնօրեն, «Տոշիբա Մեդիքալ Սիսթեմս» ընկերության պատվիրակության հայաստանյան այցի համակարգող Դավիթ Առաքելյանը:

 

Այնուհետ ԵՊԲՀ աշխատակիցները պատվիրակությանն ուղղորդեցին ծանոթանալու ԵՊԲՀ ընդհանուր և ինվազիվ սրտաբանության կլինիկային, որն ակտիվ համագործակցում է Ջեֆերսոնի համալսարանի ուլտրաձայնային ինստիտուտի հետ, և պրոֆեսոր Հմայակ Սիսակյանը ներկայացրեց կլինիկայի ձեռքբերումները, տեխնիկական հագեցվածությունը: Շրջայցի ընթացքում խոսվեց նաև ԵՊԲՀ ռազմական բժշկության ֆակուլտետի և դրա կարևորության մասին՝ հայկական բանակի համար:

 

Նախատեսված էին նաև շրջայցեր և հանդիպումներ «Սլավմեդ» բժշկական կենտրոնում և Արաբկիր ԲՀ ԵԴԱԻ-ում. սրանք կլինիկաներ են, որոնք ակտիվորեն համագործակցում են «Տոշիբա Մեդիքալ Սիսթեմս» ընկերության հետ և ունեն սույն ապրանքանիշի բժշկական տեխնիկայի լայն շրջանակ:

 

- Մեր կենտրոնի աշխատանքային կարևորագույն սկզբունքը բացարձակ որակի ապահովումն է, իսկ տեխնիկական նման կահավորումն, իհարկե, հնարավորություն է ընձեռում  հստակ ախտորոշել տարբեր պրոֆիլի հիվանդություններ: Այսօր մեծ պատիվ և ուրախություն է հյուրընկալել այն ընկերության ղեկավար կազմին, որը մեզ ապահովում է բարձրակարգ, նորագույն բժշկական տեխնիկայով, - ասում է «ՍլավՄեդ» բժշկական կենտրոնի տնօրեն Արմինե Հովակիմյանը:

 

«Տոշիբա Մեդիքալ Սիսթեմս» ընկերությունն ունի վաճառքի բարձր ցուցանիշներ Հայաստանում և հենց այս փաստն էր Տոշիբա ընկերության ղեկավար կազմի հայաստանյան այցի հիմնական դրդապատճառը: Հյուրերը հաճելիորեն զարմացած էին, որ Հայաստանի նման փոքր պետությունունն ունի որակյալ տեխնիկայով կահավորված կլինիկաներ, բարձրակարգ տեխնիկայի  նման պահանջարկ և սպառում:

 

- Հիվանդությունից որևէ մեկս ապահովագրված չենք, այս դեպքում կարևորագույն գործոնն արագ և հստակ ախտորոշումն է, ճիշտ բուժման նշանակումը՝ հնարավորին չափ  սեղմ ժամանակահատվածում:

Ես անչափ ուրախ եմ հայաստանյան բժշկական կենտրոնների հետ համագործակցության համար, քանի որ այսպիսով մենք օգնում ենք ապահովել հստակ ախտորոշում և արդյունավետ բուժում՝ հայ քաղաքացիների համար: Գաղտնիք չէ, որ ճիշտ ախտորոշումն արդյունավետ բուժման բանալին է: Ուրախությամբ պետք է նշեմ, որ տպավորված եմ Հայաստանում նման որակյալ տեխնիկայի առկայության փաստով, հույս ունեմ, որ հետագա համագործակցությունը կլինի առավել արգասաբեր և շարունակական, - ասում է «Տոշիբա Մեդիքալ Սիսթեմս» ընկերության նախագահ Սատոշի Ցունակավան:

 

Պաշտոնական այս այցի համակարգող Դավիթ Առաքելյանի մեկնաբանությամբ՝ «Տոշիբա Մեդիքալ Սիսթեմս»-ը բժշկական տեխնիկա արտադրող առաջատար ընկերություններից է: Նախորդ տարի այն նշեց իր գործունեության 100 ամյակը: Վերջին տարիներին այս ընկերության նորամուծությունները բազմաթիվ են. արտադրվեցին նաև որոշ եզակի սարքավորումներ՝ համակարգչային տոմոգրաֆ՝ 16 սմ անատոմիական ծածկույթով, որն ընձեռում է 640 տոմոգրաֆիկ շերտ ստանալու հնարավորություն: Անկարելի է չխոսել նաև Տոշիբա ընկերության որդեգրած այն քաղաքականության մասին, որն է՝ ճառագայթային ծանրաբեռնվածության չափաբաժնի նվազեցումն ընդհուպ 75%-ով:  Կարևոր է նաև այն փաստը, որ Տոշիբա ապրանքանիշի բոլոր բժշկական սարքավորումների համար է նախատեսված ճառագայթային ծանրաբեռնվածության նվազեցումը՝ ինչպես բարձրակարգ, այնպես էլ միջին դասի տեխնիկայի համար:

 

Տեղեկացնենք, որ առաջիկայում Մոսկվայում կբացվի ռուս-ճապոնական Գերազանցության կենտրոնը՝ կահավորված վերջին սերնդի նորագույն սարքավորումներով, որից օգտվելու հնարավորություն կունենան նաև հայ մասնագետները:

 

Այցի ավարտին պատվիրակության անդամներին հյուրընկալեց ՀՀ նախագահ Սերժ Սարգսյանը. ողջունելով հյուրերին նա նշեց, որ ուրախ է առողջապահության ոլորտում ինովացիոն տեխնոլոգիաների համաշխարհային առաջատար ընկերություններից մեկի՝ «Տոշիբա մեդիկալ սիսթեմս»-ի՝ Հայաստանում գործունեություն ծավալելու և հայկական ընկերությունների հետ համագործակցությունը զարգացնելու մտադրության համար: Սերժ Սարգսյանը հույս է հայտնել, որ պարոն Ցունակավայի այցը խթան կհանդիսանա փոխգործակցության զարգացման, դրանում նոր ուղղությունների և ծրագրերի ներառման համար: 

 

Տոշիբա ընկերության պատվիրակության տպավորություններն այցից միայն դրական էին, նրանք մեծ հիացումով և տպավորություններով հեռացան մեր երկրից՝ վստահություն հայտնելով, որ համագործակցությունը Հայաստանի հետ կլինի առավել ինտենսիվ և շարունակական:

 

 

 

 

 

 

---