Ապրիլի 2-ը Աուտիզմի իրազեկման համաշխարհային օրն է: Համապատասխան բանաձեւը ՄԱԿ-ի Գլխավոր ասամբլեայի կողմից ընդունվել է 2007 թվականին:
Օրվա նպատակն է վեր հանել աուտիզմ ունեցող անձանց խնդիրները՝ նպաստելով նրանց կյանքի որակի բարելավմանը:
Աուտիզմը նյարդային համակարգի զարգացման խանգարումն է, որն ի հայտ է գալիս վաղ մանկական տարիքում եւ չի ճանաչում սեռ, ռասա կամ սոցիալ-տնտեսական կարգավիճակ:
Սովորաբար երեխայի մոտ աուտիզմի նախանշանները նկատելի են դառնում նրա կյանքի երկրորդ տարում, սակայն որոշ դեպքերում աուտիզմը նկատելի է լինում ավելի վաղ՝ 12-24 ամսականում:
Հիմնական նախանշանները, որոնք կարող են վկայել աուտիզմի մասին.
- Երեխան չի ժպտում
- Երեխայի հետ աչքի կոնտակտը դժվարությամբ է հաստատվում
- Երեխան վաղ տարիքում չի թոթովում կամ չի խոսում 1 տարեկանում
- Անդադար ինչ-որ առարկաներ է շարում իրար վրա
- Անկանոն թափահարում է ձեռքերը
- Պտտվում է
- Չի կարողանում ձեռք տալ որոշ ուտելիքի կամ որոշակի կառուցվածք ունեցող առարկաների
Երբեմն այս նշանները նկատելը դժվար է, մինչեւ որ երեխան չի հասնում նախադպրոցական տարիքի:
Որոշ մարդիկ կարծում են, որ աուտիզմ կարող են ունենալ միայն այն երեխաները, որոնք չեն շփվում, չեն խոսում եւ խնդիրներ ունեն կենսական այլ ֆունկցիաների հետ, սակայն երեխան կարող է ունենալ շատ բարձր IQ, բայց, միեւնույն է, նրա մոտ աուտիզմ հայտնաբերվի:
Ուսումնասիրությունները ցույց են տվել, որ որքան վաղ է բուժում ստանում աուտիզմ ունեցող երեխան, այնքան ավելի լավ կենսակերպ է վարում հասուն տարիքում:
Աղբյուրը՝ Doctors.am
